जगायचे आहे तर ..!!!!

जगायचे आहे तर
जगू पाखरा सारखे स्वच्छंद
आयुष्यातील प्रत्येक क्षणाचा
लुटून घेऊ आनंद ।। १ ।।

जगायचेच आहे तर
जगून घेऊ फुला सारखे
अखंडपणे वाहणाऱ्या
नदीतील पाण्यासारखे ।। २ ।।

जगायचेच आहे तर
घेऊ एक गरुडझेप
कीर्तीरुपाने अमर राहू
पाठीमागच्या दुनियेत।। ३ ।।

जगायचेच आहे तर
कधी वृक्षवल्ली होऊ
शत्रू असो वा मित्र
सर्वांना प्रेम देऊ ।। ४ ।।

जगायचेच आहे तर
होऊ अंधळ्याची काठी
दुबल्यांनाही प्रेरित करू
उत्साहाने जगण्यासाठी ।। ५ ।।

जगायचेच आहे तर
कृतज्ञतेने जगूया
जीवनदात्या भगवंताला
असेच प्रेम मागुया ।। ६ ।।